ەلوردادا ستۋدەنت ديزاينەر ديماش قۇدايبەرگەنوۆتىڭ قايتالانباس پورترەتىن جاسادى. وسىلايشا ءانشىنىڭ ەرەكشە پورترەتى دۇنيەگە كەلدى.
«پيك Astana يۋتاريا ltd» فابريكاسىنىڭ توقىما تسەحى تۋدىرعان بەينەگە كاسىپورىن ماماندارى باقانداي ەكى كۇن جۇمساعان جانە بۇل تەحنولوگيالىق جاڭعىرۋدىڭ ارقاسىندا جۇزەگە استى», دەيدى بۇل تۋرالى حابار تاراتقان Elorda Aqparat سايتى.
وزىق تەحنولوگيا كومەگىمەن جاسالعان پورترەت اۆتورلارىنىڭ ءبىرى – انار ابدىعاسەنوۆا ەلىمىزدىڭ ەڭبەك نارىعىندا سيرەك كەزدەسەتىن دەسسيناتور ماماندىعىنىڭ يەسى. بۇل دەگەنىڭىز, ول توقىما ديزاينەرى, ماتا سۋرەتشىسى, توقىما قۇرال-جابدىعىنىڭ باعدارلاماشىسى جانە ينجەنەرلىك سياقتى – ءتورت بىردەي ماشىقتى قاتار الىپ جۇرەتىن ماماندىق.
قازاق ۇلتتىق ونەر ينستيتۋتىندا كيىم ديزاينى ماماندىعى بويىنشا ءبىلىم الاتىن انار ابدىعاسەنوۆا: «بىزگە تۇركيا مەن يتاليانىڭ ماماندارى كەلىپ, شەبەرلىك ساباقتارىن وتكىزگەن بولاتىن. وسى دارىستەر ارقىلى توقىمانى كومپيۋتەردە باعدارلاۋدى ۇيرەنە باستادىم. ءىس جۇزىندەگى ماشىعىمدى وسى فابريكاداعى قاتەلىكتەرىم مەن سىناقتار ارقىلى جەتىلدىرىپ ءجۇرمىن. باعدارلاما دا, توقىما ماشينالارى دا جاپونداردىكى. تولىق اۆتوماتتاندىرىلعان ماشينالاردا مايدا جانە ءىرى توقىما تۇرلەرىن جاساپ شىعارۋعا بولادى. بۇيىمنىڭ قالىڭدىعى مەن كولەمىنەن باستاپ, ون شاقتى ولشەمدى كومپيۋتەردىڭ ءوزى جاساپ بەرە الادى. جانە باعدارلاماعا تاپسىرىلعان توقىمادا قانداي قاتەلىكتەر كەتۋى مۇمكىندىگىن ماشينانىڭ ءوزى ەسكەرتىپ وتىرادى. توقىما ۇلگىلەرىنىڭ بارلىعىن كومپيۋتەر جادىندا ساقتاپ, 100 جىلدان كەيىن ونى قايتا جاساپ شىعارا الاسىڭ. سوندىقتان ءبىزدىڭ قولىمىزدا قازىر عاجايىپ مۇمكىندىكتەر بار», دەيدى بيىل ديپلومى قولىنا تيەتىن دەسسيناتور.
ال ديماشتىڭ بەينەپورترەتىن جاساۋعا 250 ءتۇرلى توقىما ءتۇرى قولدانىلعان. توقۋ بارىسىندا ەڭ بولماسا ءبىر توردى نەمەسە ءجىپتىڭ ءبىر ءتۇرىن دۇرىس تاڭداماساڭ تۇك شىقپايدى ەكەن.
ال اتالمىش فابريكانىڭ ادامدارى ەپتى دەسسيناتورلاردى تابۋ دا, ۇيرەتۋ دە وڭايعا تۇسپەيتىنىن, انار وزدەرىنىڭ ولجاسى ەكەندىگىن ايتادى.
ايناش ەسالي, «ەگەمەن قازاقستان»
سۋرەتتى تۇسىرگەن ۆاسيلي كراس